Посете го СКУПИ

Скопје виа Скупи

Ако верувате дека сте скопјанец, најдете време, сами или со некој од вашите блиски, и прошетајте до Зајчев Рид во близина на знаменитиот антички локалитет Скупи
-Одамна, многу одамна, во времето на налудничавиот император Калигула, Скупи го опкружуваше дива и питома вегетација, обележена со групи, редови и осамени медитерански борови и чемпреси. Нив особено ги имаше околу вежбалиштата за нега на убавото и здраво тело (ценето и сакано), па затоа никој не прашуваше колку тоа чини. Градот беше испланиран и граден по пропишана римска шема, во правоаголна мрежа, со правилни инсули, раздвоени со триумфална авенија која постапно се крева до големиот театар, граден од речен камен и печена тула, што и денес може да се забележи кога сонцето на залез ги осветлува и позлатува градежните остатоци.
-Беше тоа време кога Скупи стана централен римски каструм на Балканот, најголем од Беломорски брег до Дунав, двапати поголем од Стоби и четири пати од Хераклеја.

Ако верувате дека сте скопјанец, најдете време, сам или со некој од вашите блиски и прошетајте до Зајчев рид во близина на знаменитиот антички локалитет Скупи. Некогаш тоа беше омилено место за еднодневни екскурзии на граѓаните и учениците од сите школи во градот, каде редовно се одржуваше настава во природа. Посетите беа редовно одбележувани како посебен настан во тогашните весници и школските годишни извештаи.

„Што се би дал или сторил некој што го нема ова европско цивилизациско богатство, за да го има...!? „